Mejuah-juah.   Rudang Rakyat Sirulo Comunity    Mejuah-juah.
    <--> MEJUAH-JUAH <-->

    Sunday, January 15, 2012

    Anak Perana Empat Sembuyak (Budak Jantan Empat Sedulur)

                Bena turi-turin enda, emkapken: turi-turin sada jabu sini i buang ku sada taneh(pulau) sini melungen ras kerangen numbun raya i negeri Sepucuk Jambi Sembilan Lurah sini i gelari Pulau Berhala( sada pulai i Kab. Tanjung Jabung Timur sini gelarna i buat arah sekalak Penyiar Ajaren Islam i Jamb,i rikutken sini mannteki ingan e, emkapken tergelar Ahmad Barus II, ‘ntah-pe sini-ipergelari Paduko Datok Berhalo). Pa Jambai ras ndeharana beru Rudang(Bunga[o]) i pelawes arah kutana negeri Melayu Jambi, erkiteken ia i kata-katai(fitnah)nggelem ras makaiken sada pemeteh si la mehuli i kuta e, maka sibayak(raja) negeri e ‘mpelawes ia rikutken peempatken anakna si dilaki.

                I bas inganna simbaru e, kai pe lenga lit idapetina seakatan kerangen ras lawit simbelang. Maka Pa Jambai ras ndeharana beru Rudang rikutken anakna si peempatken e majekken sapo i taneh e makeken kai sini lit i taneh e, bagepe sini mombak i babai galumbang ku tapin lawit pulau e.

                Anak sintua, Sulung, bagem i pergelari nandangi anakna sintua. Perbahan sehkel enggo lihena ia, lawes me ia kutepi lawit maka i tangkapina nurung-nurung lawit sini mombak(terdampar) ku tapin perbahan derasna galumbang, bagepe sini i buatna salu nujut make tumbakna sini i bahanna arah buluh. Perbahan seh lihena kel ia maka lanai tertahanna ras  kai pe lanai i ukurina, i panna me matah-matah nurug e. Perbahan biarna kel ia tereteh nande ras bapana bagepe sembuyakna kerina, maka pedas-pedas ia man-sa ras salu erbuni-buni i balik ranggasen sini lit i tepi lawit e.

                Arah datas uruk sini meganjangna i taneh e, anak singuda arah empat sembuyak e la sengaja ngidah perbahanen kakana sintua, maka nina bas ukurna: “ Ikh! Kai nge sini i lakoken tua-ku(kakak tertua) oh? Bagi sini enggo lit pangan sini sikap akapna man-sa.”
    Tangkas i idahna maka kakana sintua e sangana man nurung ngeluh(matah) denga sini baru i tangkapna arah lawit, maka rukur ka ia ras nina bas ukurna, “La aku merhat ngganggu kerna kegeluhen rubia-rubia, apaika adi sempat mbunuhsa.” Nina anak singuda bas perukurenna. 
                Emaka natapka anak singuda e ku kempak ingan sideban. I teruh uruk ingan anak singuda e sangana kundul ras natap-natap ku skelewetna, maka teridahka i matana, kakana, emkapken anak pe-duaken arah empat ia sembuyak e sangana ngkuraki taneh. I tatap anak singuda e arah inganna salu manek-manek “kai nge ndia sini lakoken kaka ku oh?”  atena ka.

                Piga-piga paksa kenca e i idahna maka kakana e enggo ngkuraki taneh e cukup mbelang maka sengget ia, i idahna sada lau mulgap arah taneh e maka ngenengi taneh sini i kuraki kakana e, maka nggo dum bali kolam entah pe danau. Meriah ukurna ‘perdiatekan pendahin kakana e maka i tatapna lalap kai saja sini i lakoken kakana e. E maka piga-piga paksa i idahna maka kakana e erkeneng i kolam e seh maka piga-piga wari piah-piah lanai i ingetna man erkitekan besur ia minem lau ras meriahna akapna erkeneng i bas lau e.

                Piga-piga wari knca si e, mulih me anak singuda e ku inganna biasa kundul ras natap-natap i uruk pulau e. I tatapna sekelewetna ka, i idahna kakana sintua sangana ndarami nurung i tepi lawit,  rikutken kakana sipedua-ken sangana meriah erkeneng i lau sini i bahanna salu engkurakisa. E maka rukur ka ia, nina: “Meriah kel tuhu i akap dua kaka-kakaku enda, kai nge ndia sini banci ku lakoken gelah ukurku e pe la serbut?” ndekah ia rukur maka i tatapna ka ku sekelewetna. I arahkenna me tatapen matana ku arah pustima(barat), maka tangkas ka teridah salu matana sembuyakna peteluken sini sanganna mangani bulung-bulung meratah bagepe buah-buah i kerangen. Merangap kel i idahna sembuyakna e mangani bulung-bulung ras buah-buahen e maka erbahan mamang ka ukurna ngenehen bana sini kai pe lalit i lakokenna guna muat panganna bagepe erbahan meriah ukurna.

                Maka perbahan morahna kel atena, turah me bas ukurna nungkun orang tuana kai nge ndia sini banci i lakokenna guna mbeneken kegogon ras ukur picetna.
                Seh i sapo ija nande ras bapana sangana medem. I idahna ntabeh kel perpedem orang tuana e maka nina ka bas pusuhna: “Ciger wari bagenda nande ras bapa banci terpedem, tempa-tempa lalit si jadi perukurenna seri ras peteluken sembuyakku. Yo’oh! Engkai maka aku la mbera bagi kalak e?” nina erbelas bas perukurenna.
                Bagi tempa-tempa nggejabken anakna lit i je; termedak me Pa Jambe arah perpedemna. I bukana matana maka teridah man banna anakna singuda kundul i lebe-lebenana. Maka, nina salu erpenungkunen, “ ‘Nggo kam je, anakku?”
                Nina ka nandena, “Ndigan nai kam reh oh, anak nandena? Maka la ngata-ngata kam enggo kundul i je?” i tatap nandena sekelewetna sekalak ngenca ia, maka nia nandena ka, “I ja nge ndia senina-seninandu maka sisada kam ku idah e?”

                Erjabab anak singuda, nina: “Uai, nande - bapa! Sekalak nge ndai aku. Senina-seninaku kerina enggo lit pendahinna sekalak-sekalak sini erbahansa maka meriah ukurna.”
                “Engkai maka bage nindu, anakku?” erpenungkun bapana ka, sambungna, “Ku idah ringut ayondu e, me labo sangana kam rubat e ras sembuyakendu, anakku?”
                “Lang, Bapa!” jawab anak singuda. Sambungna ka, “Ku idah seninaku emkapken kaka tua ndarami nurung i tepi lawit ras i panna matah-matah nurung sini datna; emaka kutatapka ku teruh uruk inganku rusur donggal sisana, maka tangkas ka me teridah salu mataku kaka ku si peduaken  engkuraki tanah maka arah tanah e enggo bagi belanga ras arah teruh tanah e mulgap nge lau ras maler ndumi taneh sini i kurakina e, jana erkeneng sembuyakku e i bas lau e.” I tarikna kesahna salu gedang maka i lanjutkenna ka ceritana, nina: “E, maka ku nehenka i arah surutna matawari i pustima(barat) maka teridah ka salu mataku si Agi anak singuda sangana meriah ukurna mangani bulung-bulung meratah bage pe buah kayu i kerangen. Ngidah kai kerina perbahanen sembuyak ku e maka megogo, mamang, rikutken kiti ukur ku, Bapa!”

                “Engkai maka bage, anakku?” nina ka bapana erpenungkun.
                “Perbahan kerina sembuyak ku e enggo lit pendahinna sini erbahansa maka meriah-ukurna ras e jadi pangan sini sikap akapna man pencarinna, bapa ku!”
                “O, bage nge?” nina ka bapana janah nggeleng-nggelengken takalna.
                “Tapi, maun-maun rukur aku, labo ka sikap ku akap bagi sini i lakoken sembuyak-sembuyak ku e, bapa! Maka maun litten kuakap sinik saja bagi aku e.”
                “Bagi kam e pe labo ka mehuli, anakku!” nina bapana ngaloi.
    Sungkun anak singuda ka, “Jadi, uga nge sini ‘ulina o, bapa?”
    “Ninita nai-nai nari ndarami panganna salu ngerjai taneh(mengolah tanah). Salu pendahin si mehuli i suanina tanehna maka turah kai ni suan ras erbuah, bagepe i asuh salu mejile kai sini ia merhat maka mbur kerina asuh-asuhenna.” Nian bapana ngaloi, sambungna “Kerna kai sini man panganen, labo min salah bagi sini pan sembuyak-sembuyakndu oh. Mejile adi sembuyakndu erdahin guna pesenang ukurna ras ndatken panganen man bana, tapi, nurung i tangkap i tasakken makana i pan, bagepe bulung-bulung simeratah. Buah-buahen timai tasak maka i pan. Kakandu sintua ndarami nurung i tepi lawit, emaka kakandu si peduaken erbahan ndarami ras pepulung lau salu erdahin engkurakki, maka kaka ngudandu nuan rikutken ndarami bulung-bulung ras buah-buah guna nakanna. Bicara min kam sini enggo ngasup rukur ngataken maka cara seninandu e kurang mehuli banci pehuli ras persada pemeteh sini i idahndu arah perbahanen-perbahanen sembuyakndu maka tek aku, anakku maka kam banci si jorena.”

               “Jadi, aku harus ngolah taneh e ras makeken pemetehku, bapa?” sungkun si anak singuda ka ku bapana.
    “Kai sini ku kataken e kerina mulihi ka ku kam, anakku!” jawab bapana, nina ka: “aku ras nandendu mungkin bas sada paksa pepagi lawes nadingken kena anak-anak kami e. Mungkin adi ngenehen umur bapandu e si enggo metua, ku akap lanai bo ndekah e!”
    Megi-megi cakap perbulangenna e mamangkel ukur beru Rudang maka rempet ia mate. Sengget pusuh Pa Jambai ngidah kai siterjadi nandangi ndeharana e maka rempetka ia mate.
    Ngidah-ngidah si e nderkuh si Bungsu megang maka peteluken sembuyakna e megisa ras minter ndahi ia....
    Kenca peempatken sembuyak e nanemken mayit nande ras bapana. Ngerana anak sintua, nina, “Aku ngerana perbahan aku me sintuana arah kita sini lit i jenda. Ku kataken maka mulai genduari sidarami me dalin geluhta sekalak-sekalak seh paksana pepagi kematen ngelegi kita bagi sini enggo terjadi nandangi nande ras bapata. Ku pepayo me aku jadi kalak i lawit.”
    “Uai, adi bagekin kaka”, nina si anak singuda ngaloi. “Adi kam kaka tengah(si Abang)?” sungkun si Bungsu.
    Jawab anak sipeduaken, nina: “Aku pe ersura-sura nadingken ingan enda. Ersura aku ndarami ingan sini lit lau tawarna. I ja pepagi lit lau(danau, sungai) i je me pepagi aku ringan.
    “Aku ka pe lawes nge ateku Senina!” nina ana singuda man si Bungsu.
    “Kam, ku ja ka kam ersura-sura, agiku anak singuda?  Erpenungkun si Engah man agina (si Adik).
    “Lawes ateku ku i ngan si tanehna mejile, gelahna banci pepagi aku nuan-nuan je. Tapi, inget! Kune pepagi tedeh atendu aku, ual daramindu aku i deleng, i baluren, entahpe embang,  tapi, daramilah aku i tapin lau si mbelin.
    “Adi bage. Adi lawes kin ate kena. Sirang me kita, maka sirang mejuah-juah oh, kam kerina sembuyakku. Adi kerna aku langa bo dengan eteh perdalanku, tapi bagi sini i kataken bapa muatna lawes gelah aku ngolah taneh ras makekan pemetehku bage nge sini ku lakoken paksa pepagi.” Janahna ndakep peteluken sembuyakna e.

                Kenca e sirang me peempatken sembuyak e. Tading me anak singuda si i pulau e. Peteluken sembuyakna salu pemetehna sekalak-sekalak ngepari lawit Berhala ku tapin Ujungjabung, je nari maka berkat ndarami inganna sekalak-sekalak.! SEKIAN....


    Judul Asli: Budak Jantan Empat Sedulur
    Cerita Rakyat, Jambi.



    No comments:

    Post a Comment

    Mejuah-juah!